وزیرخارجہ شاہ محمود قریشی نے کہا ہے کہ بھارت کا مقبوضہ کشمیر میں صورتحال معمول کے مطابق ہونے کا جھوٹا دعویٰ اقوام متحدہ کی سلامتی کونسل اور اقوام متحدہ کی انسانی حقوق کونسل سمیت عالمی سطح پر بے نقاب ہوگیا ہے۔
انہوں نے آج ریڈیو پاکستان کے خبروں اور حالات حاضرہ کے چینل سے گفتگو کرتے ہوئے کہا کہ بھارت مقبوضہ کشمیر میں معمول کی زندگی بحال ہونے کا دعوےکرکے دنیا کو گمراہ کرنے کی کوشش کررہا ہے تاہم مختلف عالمی فورموں پر کشمیریوں کےلئے اٹھنے والی آوازوں سے بات ثابت ہوگئی ہے کہ بھارت کا دعویٰ سفید جھوٹ ہے۔
انہوں نےکہا کہ بھارت میں اقلیتوں اور معاشرے کے سیکولر طبقے نے آ ر ایس ایس اور ہندوتوا ذہنیت کو مسترد کردیا ہے۔
شاہ محمود قریشی نے کہا کہ دنیا نے اس بات کا بھی نوٹس لیا ہے کہ کشمیریوں کو یوم عاشور منانے کے مذہبی حق سے بھی محروم کردیاگیا۔
انہوں نے کہا کہ مقبوضہ کشمیر میں مسلسل کرفیو کے باعث کھانے پینے کی اشیا اور ادویات کی شدید قلت ہے اور دنیا کرفیو اٹھانے کا مطالبہ کررہی ہے۔
وزیر خارجہ نے مقبوضہ کشمیر میں مواصلاتی روابط مکمل طور پر منقطع کئے جانے پر ریڈیو پاکستان کی اہمیت کا اعتراف کرتے ہوئے کہا کہ ریڈیو پاکستان کشمیریوں کے لئے اطلاعات تک رسائی کا واحد ذریعے ہے جنہیں انٹر نیٹ اورموبائل فون سروس تک رسائی حاصل نہیں ہے۔