سنٹرل ڈویلپمنٹ ورکنگ پارٹی نے 31 ارب روپے سے زائد مالیت کے آٹھ منصوبوں کی منظوری دی ہے جبکہ 40 ارب روپے سے زائد مالیت کے تین منصوبوں کو غور کے لئے قومی اقتصادی کونسل کی انتظامی کمیٹی کو بھجوا دیا ہے۔

کمیٹی کا اجلاس اسلام آباد میں منصوبہ بندی کمیشن کے ڈپٹی چیئرمین محمد جہانزیب خان کی صدارت میں ہوا۔ جس میں توانائی ،نظم ونسق، فزیکل پلاننگ اور ہائوسنگ، سائنس اورٹیکنالوجی، ٹرانسپورٹ اور مواصلات اورآبی وسائل سے متعلق منصوبوں کی منظوری دی گئی۔اجلاس میں سات ارب نوے کروڑ روپے کے مالیت کے بلوچستان روزگار کاروباری پروگرام کی بھی منظوری دی گئی۔منصوبے کابنیادی مقصد بلوچستان کے آٹھ اضلاع میں روزگار کے مواقع پیدا کرنا اور پائیدار کاروبارکوفروغ دینا ہے جوپناہ گزینوں کی طویل عرصے سے موجودگی کی وجہ سے متاثر ہوئے ہیں۔(این این آر، وہاج بشیر)