وزیراعظم عمران خان نے پنجاب میں صحت کارڈ سکیم کے بھرپور انداز میں نفاذ کویقینی بنانے کیلئے متعلقہ حکام کو تمام وسائل استعمال کرنے کی ہدایت کی ہے ۔
آج (جمعہ)اسلام آباد میں پنجاب کے باشندوں کوصحت کارڈ دینے کے حوالے سے اجلاس کی صدارت کرتے ہوئے وزیراعظم نے کہاکہ ملک بھر میں عوام کو صحت کی سہولیات فراہم کرنا موجودہ حکومت کے وژن کا اہم حصہ ہے ۔انہوں نے کہاکہ معاشرے کے غریب طبقے کو صحت کی معیاری سہولیات فراہم کرنا ہماری ذمہ داری ہے ۔انہوں نے کہاکہ صحت کارڈ سکیم سے نہ صرف ضرورت مندوں کو بہترین طبی سہولیات مہیا ہوں گی بلکہ اس سے نجی ہسپتالوں کو بھی فروغ ملے گا ۔اجلاس کو بتایاگیا کہ پنجاب کے تمام چھتیس اضلاع میں چار کروڑ صحت کارڈز کی تقسیم کا عمل 31 دسمبر سے اگلے سال مارچ تک مکمل کیاجائے گا ۔