پاکستان تحریک انصاف کی رہنما منزہ حسن نے کہا ہے کہ ان کی جماعت کے برسر اقتدار آنے کے بعد پاکستان کی خارجہ پالیسی میں اہم تبدیلیاں کی جائیں گی۔

 آج ریڈیو پاکستان کے خبروں اور حالات حاضرہ کے پروگرام میں گفتگو کرتے ہوئے انہوں نے کہا کہ پاکستان کی خارجہ پالیسی ہمسایہ ممالک کے ساتھ بالخصوص اور دیگر ممالک کے ساتھ بالعموم دوستانہ تعلقات برقرار رکھنے پر مبنی ہے۔

منزہ حسن نے کہا کہ پاکستان تحریک انصاف کے چیئرمین عمران خان بھی اسی پر یقین رکھتے ہیں اور برابری کی بنیاد پر عالمی تعلقات قائم کرنے کے خواہشمند ہیں۔

ایک سوال کے جواب میں انہوں نے کہاکہ کشمیر پاکستان کے لئے سب سے اہم مسئلہ ہے اور پاکستان اس تنازعے کو حل کرنے کے لئے پرعزم ہے۔

 منزہ نے کہاکہ مسئلہ کشمیر کو صرف مذاکرات کی میز پر حل کیا جاسکتا ہے ،انہوں نے کہاکہ پاکستان اور بھارت کو علاقائی امن کے قیام کے لئے اس تنازعے کو حل کرنے کی ضرورت ہے۔