ریلوے کے وزیر شیخ رشید احمد نے کہا ہے کہ مین لائن ون ٹریک سے ریلوے حادثات پر قابو پانے اور ہزاروں نوجوانوں کیلئے روزگار کے مواقع پیدا کرنے میں مدد ملے گی۔انہوں نے جمعہ کی سہ پہر اسلام آباد میں ایک نیوز کانفرنس سے خطاب کرتے ہوئے کہا توقع ہے کہ قومی اقتصادی کونسل کی ایگزیکٹو کمیٹی اس ماہ مین لائن ون منصوبے کی منظوری دے گی۔انہوں نے کہاکہ یہ کراسنگ فری ٹریک ہوگا جس سے کراچی سے لاہور تک کے سفری دورانیے میں سات گھنٹے کی کمی آئے گی جبکہ راولپنڈی سے لاہور کا سفر صرف دو گھنٹے میں طے ہوگا۔شیخ رشید احمد نے کہا کہ ایم ایل ون سے ریل گاڑیاں ایک سو ساٹھ کلومیٹر فی گھنٹہ کی رفتار سے چلیں گی جنہیں مزید بڑھا کر دو سو کلومیٹر فی گھنٹہ کیا جاسکتاہے۔انہوں نے کہا کہ ایم ایل ون ایک انقلابی منصوبہ ہے جسے حکومت مکمل کریگی اور اس سے پاکستان ریلوے کا پورا ڈھانچہ بہتر ہوگا۔وفاقی وزیر نے کہاکہ اس منصوبے کی تکمیل کیلئے انجینئرز اور دس فیصد تکنیکی عملہ چین سے آئے گا جبکہ باقی افرادی قوت پاکستان سے لی جائیگی۔انہوں نے کہا کہ اربوں ڈالر مالیت کا یہ منصوبہ چین کی مدد سے پانچ سے آٹھ سال کی مدت میں مکمل ہوگا۔