وزیراعظم عمران خان نے کہا ہے کہ حکومت ٹڈی دل پر قابو پانے کی ہر ممکن کوشش کریگی کیونکہ اس مسئلے کا ملک کے غذائی تحفظ کے نظام سے براہ راست تعلق ہے۔انہوں نے یہ بات جمعہ کے روز اسلام آباد میں ٹڈی دل کی روک تھام کے قومی مرکز میں ٹڈی دل پر قابو پانے کے قومی لائحہ عمل پر ایک بریفنگ میں اظہار خیال کرتے ہوئے کہی۔وزیراعظم نے انسداد ٹڈی دل کیلئے قومی لائحہ عمل کے دوسرے مرحلے کی اصولی طورپر منظوری دی اس پیکج کے ذریعے متاثرہ کاشتکاروں کے نقصان کا ازالہ کرنے کا فیصلہ بھی کیا گیا۔عمران خان نے ٹڈی دل کے حملے پر موثر انداز میں قابو پانے اور اس مقصد کیلئے ملکی سطح پر تیار کئے گئے آلات استعمال کرنے پر پاک فوج سمیت وفاقی اور صوبائی حکومتوں کی بروقت اور مربوط کارروائی کو سراہا۔انہوں نے کہا کہ ٹڈی دل کے نقصانات سے نمٹنے کیلئے وفاقی اور صوبائی حکومتوں اور اداروں کے موثر اور مربوط قومی لائحہ عمل کی ضرورت ہے تاکہ فصلوں کی پیداوار متاثر نہ ہو۔عمران خان نے کہا کہ کوروناوائرس کے ساتھ ٹڈی دل کا حملہ پاکستان کے لئے بڑا چیلنج ہے۔
