سینٹ کو آج بتایا گیا کہ حکومت بہت جلد بیرون ملک مقیم پاکستانیوں کے لئے نیشنل ایمیگریشن اینڈ ویلفیئر پالیسی کا اجرا کررہی ہے۔
ایک سوال کے جواب میں مواصلات کے وزیر مملکت مراد سعید نے ایوان کو بتایا کہ حکومت بیرون ملک مقیم پاکستانیوں کے مسائل ترجیحی بنیادوں پر حل کرے گی ۔ انہوں نے کہا کہ ملکی ترسیلات زر میں اضافے کے لئے ایک پیکیج متعارف کرایا جارہا ہے۔
ایک اور سوال کے جواب میں پارلیمانی امور کےوزیر مملکت علی محمد خان نے کہا کہ حکومت ملک میں کھیلوں کی سرگرمیوں کے فروغ کے لئے پرعزم ہے۔
انہوں نے کہا کہ ایبٹ آباد کرکٹ سٹیڈیم کو مردوں اور خواتین دونوں کی کرکٹ ٹیموں کے تربیتی کیمپوں کےلئے اکثر استعمال کیا جاتا ہے۔ انہوں نے کہا کہ پاکستان سپر لیگ کے میچز ایبٹ آباد میں کرانے کا فی الحال کوئی منصوبہ زیر غور نہیں ہے،تاہم انہوں نےکہا کہ ایبٹ آباد کرکٹ سٹیڈیم مقامی میچوں کے انعقاد کے لئے استعمال کیا جاتا ہے۔
