صدر ڈاکٹر عارف علوی اور وزیراعظم شہباز شریف نے یوم عاشور کے موقع پر اپنے پیغامات میں کہا ہے کہ حضرت امام حسین کی قربانی کا فلسفہ تمام مسلمانوں کیلئے مشعل راہ ہے۔
صدر مملکت نے اپنے پیغام میں کہا کہ یہ دن ہمیں یاد دلاتا ہے کہ ہمیں انفرادی اور اجتماعی سطح پر ہمیشہ حق کی فتح کیلئے صبر، حوصلے اور ثابت قدمی کے ساتھ جدوجہد کیلئے ہمیشہ تیار رہنا چاہیے۔ وزیراعظم نے ٹویٹر پر اپنے پیغام میں کہا کہ انسانیت کو متعدد چیلنجوں کا سامنا کرتے ہوئے رکاوٹیں ختم کرنے کیلئے حضرت امام حسین اور ان کے جانثاروں کے مثالی کردار سے رہنمائی حاصل کرنی چاہیے۔ انہوں نے کہا کہ صبر وتحمل، وفاداری، اتحاد اور رواداری کے ذریعے تقسیم، انتشار اور افراتفری پھیلانے والی قوتوں کو شکست دی جاسکتی ہے۔وزیراعظم نے کہا کہ انسانیت کو مساوات اور آزادی کی بنیاد پر نئے عالمی نظام کیلئے حضرت امام حسین کے پیغام سے رہنمائی ملتی رہے گی۔