حکومت نے لوگوں کو سستی رہائش فراہم کرنے کے لئے سرکاری اور نجی شراکت داری کے تحت رہائشی یونٹوں کی تعمیر کا کام تیز کردیا ہے۔

 نیا پاکستان ہاوسنگ اتھارٹی کے ترجمان عاصم شوکت علی نے ریڈیو پاکستان کے خبروں اور حالات حاضرہ کے چینل کو ایک خصوصی انٹرویو دیتے ہوئے بتایا کہ نجی بلڈرز نے تیس لاکھ سے زائد رہائشی یونٹ تیار کئے ہیں۔

اتھارٹی نے پنجاب اور دوسرے صوبوں میں شہری علاقوں کے نواح میں منصوبے شروع کرنےکا فیصلہ کیا ہے جہاں ساڑھے تین مرلے کے گھروں میں تمام بنیادی سہولتیں فراہم کی جائیں گی۔

 ترجمان نے کہاکہ حکومت غریبوں کو زمین کی لاگت اور شرح سود پر اعانت فراہم کررہی ہے تاکہ وہ گھر حاصل کرسکیں۔

انہوں نے کہا کہ ہاوسنگ کے شعبے میں منصوبوں  سے ملک میں معاشی سرگرمیاں تیز ہوئی ہیں اور بیالیس متعلقہ صنعتوں کے کاروبار کو فروغ ملا ہے۔

 ایک سوال کے جواب میں انہوں نے کہا کہ تمام مستحق افراد کو اس موقع سے فائدہ اٹھانا چاہیے اور سرکاری مراعات کی مدد سے گھر کی سہولت حاصل کرنی چاہیے۔