پاکستان ریلویز نےچین پاکستان اقتصادی راہداری کے تحت اربوں ڈالر کے کراچی تا پشاور دوطرفہ پٹڑی مین لائن ون منصوبے کے ٹینڈرز ہفتے کو جاری کرنے کی تیاری کرلی۔
محکمے کے ایک اہلکار کے مطابق چونکہ اس منصوبے کی لاگت اور تعمیر سی پیک کے تحت کی جائے گی لہٰذا ٹینڈرز چینی فرموں کی دلچسپی حاصل کرنے تک محدود ہوں گے۔
ایم ایل ون منصوبے کی تفصیلات بتاتے ہوئے انہوں نے کہا کہ یہ منصوبہ تین پیکیجز پر مشتمل ہے، پیکیج ون کے تحت لالہ موسیٰ اور لاہور، لاہور اور ملتان اور نواب شاہ اور روہڑی کے درمیان موجودہ پٹڑیوں کو تبدیل اور بہتر کیا جائے گا۔
پیکیج ٹو لالہ موسیٰ تاراولپنڈی، نوشہرہ تا پشاور اور حیدر آباد تا کراچی سیکشنز کی بہتری پر مشتمل ہوگا جبکہ پیکیج تھری میں ملتان ،خانیوال تا سکھر مین لائن کے باقی حصوں کی بہتری شامل ہے۔