وزیر خارجہ شاہ محمود قریشی نے کہا ہے کہ پاکستان افغانستان میں قیام امن کے لئے اپنا مصالحتی کردار ادا کرتا رہے گا۔
آج اسلام آباد میں امریکی ناظم الامور پال ڈبلیو جونز سے بات چیت کرتے ہوئے انہوں نے کہا کہ پورے خطے کی ترقی اور خوشحالی کا انحصار افغانستان میں امن پر ہے۔
وزیر خارجہ نے کہا پاکستان افغانستان کے ساتھ امن بات چیت بحال کرنےکے امریکی فیصلے کا خیر مقدم کرتا ہے۔
اس موقع پر افغانستان اور خطے میں سلامتی کی صورتحال اور پاکستان اور امریکہ کے درمیان دوطرفہ تعلقات پر تبادلہ خیال کیاگیا۔
اس سے پہلے اسلام آباد میں ایک اجلاس کی صدار ت کرتے ہوئے وزیر خارجہ نے بین الاقوامی غیر سرکاری تنظیموں کے رجسٹریشن کے عمل میں ہر ممکن سہولت فراہم کرنے کا یقین دلایا ہے۔
وزیر خارجہ نے مختلف شعبوں میں بین الاقوامی غیر سرکاری تنظیموں کی خدمات کو سراہا۔ تاہم انہوں نے کہا کہ ان غیر سرکاری تنظیموں کی رجسٹریشن اور ان کی طرف سے قوانین کی پاسداری کو یقینی بنایا جائے گا۔
