وزیر خزانہ حماد اظہر نے عوام کو اشیائے ضروریہ کی معیاری نرخوں پر فراہمی کے لئے تمام متعلقہ اداروں کو مشترکہ اقدامات کرنے پر زور دیا ہے۔انہوں نے پیر کے روز اسلام آباد میں قیمتوں کی نگرانی کی قومی کمیٹی کے اجلاس کی صدارت کرتے ہوئے کہا کہ مہنگائی پر قابو پانا حکومت کی اولین ترجیح ہے۔انہوں نے یوٹیلٹی سٹورز کارپوریشن کے ایم ڈی کو ہدایت کی کہ وہ رمضان المبارک کے دوران یوٹیلٹی سٹورز پر اشیائے ضروریہ کی بلاتعطل فراہمی یقینی بنائیں۔وزیر خزانہ نے صورتحال کا جائزہ لیتے ہوئے صوبائی حکومتوں کے نمائندگان کو ہدایت کی کہ وہ آٹے کے تھیلوں کی قیمتوں کی نگرانی کیلئے مناسب اقدامات کریں۔کمیٹی نے صوبوں پر زور دیا کہ وہ مناسب قیمت پر آٹے کی بلاتعطل فراہمی یقینی بنانے کیلئے تمام ممکنہ اقدامات کرے۔