کشمیر کمیٹی کے چیئرمین شہریار آفریدی نے اس عزم کا اعادہ کیا ہے کہ پوری پاکستانی قوم حق خودارادیت کے حصول تک کشمیری بھائیوں کے شانہ بشانہ ہے۔ منگل کے روز اسلام آباد میں کشمیریوں کے حق خودارادیت کے دن کے سلسلے میں ایک سیمینار سے خطاب کرتے ہوئے انہوں نے کہا کہ ہم کشمیر کی آزادی کے نصب العین کیلئے متحد ہیں۔شہریار آفریدی نے کہا کہ پاکستان کشمیریوں کی اخلاقی سفارتی اور سیاسی حمایت جاری رکھے گا اور حق خودارادیت کیلئے کشمیریوں کے ساتھ کیا گیا وعدہ پورا کیا جانا چاہئے۔