اقوام متحدہ کی جنرل اسمبلی نے پاکستان کی جانب سے بین المذاہب اور بین الثقافتی مذاکرے کے فروغ کے بارے میں پیش کی جانے والی قرارداد کو بھاری اکثریت سے منظور کر لیا ہے۔فلپائن کے اشتراک سے یہ قرار داد بین المذاہب ہم آہنگی، رواداری، ایک دوسرے کے مذاہب اور اقدار کیلئے احترام اور پرامن بقائے باہمی کے فروغ کیلئے پاکستان کی عالمی کوششوں کا حصہ ہے۔قرارداد میں پاکستان کی طرف سے کرتارپور اقدام کا خیر مقدم کیا گیا اور اسے امن کیلئے بین المذاہب اور بین الثقافتی تعاون کیلئے ایک تاریخی اقدام قرار دیا گیا۔یہ قرارداد دنیا بھر میں بڑھتی ہوئی مذہبی عدم برداشت اور نسل پرستی خصوصا اسلام کے خلاف بڑھتے ہوئے منفی پراپیگنڈے کے تناظر میں دور حاضر کے ان مسائل سے نمٹنے اور ایسے رجحانات کی روک تھام کیلئے ضروری اقدامات کرنے کی غرض سے انتہائی اہم ہے۔
