وزیراعظم عمران خان نے پولیو کیسز کے حوالے سے انتہائی حساس بائیس اضلاع کی انتظامیہ کو ہدایت کی ہے کہ وہ معذوری کا باعث بننے والی بیماری کے خاتمے کے لئے ہنگامی اقدامات کریں۔
انہوں نے منگل کے روز پولیو کی روک تھام کے لئے صوبائی چیف سیکرٹریز اور ڈپٹی کمشنرزکے آن لائن اجلاس سے خطاب کرتے ہوئے ان سے کہا کہ وہ ملک سے پولیو کیسز کی تعداد میں کمی کا بھرپور فائدہ اٹھائیں اور اس کے مکمل خاتمے کے لئے کام کریں۔اجلاس میں وزیراعظم کے معاونین خصوصی ڈاکٹر فیصل سلطان' ڈاکٹر شہباز گل اور اعلیٰ حکام نے شرکت کی۔وزیراعظم کو بتایا گیا کہ گزشتہ چھ ماہ کے دوران ملک بھر میں پولیو کا کوئی کیس سامنے نہیں آیا جس سے ملک سے پولیو کے خاتمے کا نادر موقع ملا ہے۔