غربت کے خاتمے کے بارے میں وزیراعظم کی معاون خصوصی ثانیہ نشتر نے ہفتہ کے روز اسلام آباد میں ایک اجلاس کی صدارت کرتے ہوئے اپنی نوعیت کے پہلے احساس سیکنڈری ایجوکیشن کے نقد رقم کی مشروط منتقلی کے پروگرام کی منظوری دی۔پروگرام سے مستحق خاندانوں کو اپنے بچوں کو سیکنڈری سکولوں میں داخل کرانے کی سہولت ملے گی اور یہ پروگرام اس سال ملک بھر میں جولائی میں شروع کیاجائے گا۔ایک بیان کے مطابق پروگرام پر صوبوں کے محکمہ تعلیم کے تعاون سے عملدرآمد کیا جائے گا۔مستحق خاندانوں کے بیٹوں کے لئے ہر تین ماہ بعد ڈھائی ہزار جبکہ بیٹیوں کے لئے تین ہزار روپے کی گرانٹ فراہم کی جائے گی تاہم اس کے لئے بچوں کی سکول میں ستر فیصد حاضری ضروری ہوگی۔تمام ادائیگیاں بچوں کی مائوں کو بائیو میٹرک کے ذریعے کی جائے گی۔معاون خصوصی نے اس موقع پر اپنے کلمات میں کہاکہ احساس پروگرام کا مقصد ملک کے غریب ترین خاندانوں سے غربت کا خاتمہ کرنا اور سیکنڈری کی تعلیم سے محروم علاقوں میں تعلیم کی فراہمی یقینی بنانا ہے۔
