چیئرپرسن ریلویز پروین آغا نے کراچی سے اس ٹرین کا افتتاح کیا۔

 افغانستان کو 5سال بعد ٹرانزٹ ٹریڈ کی سہولت بحال
02 جون 2017 (15:15)
0

پاکستان ریلویز نے پانچ برس کے بعد افغانستان کو ٹرانزٹ ٹریڈ کی سہولت فراہم کرنے والی گڈز ٹرین گیتا (گڈز ان ٹرانزٹ فار افغانستان)بحال کر دی ہے، افغانستان کے تاجروں کو پشاور کے راستے مال برداری کی سہولت فراہم کرنے والی یہ ٹرین وسائل کی کمی وجہ سے 2012میں بند کر دی گئی تھی۔ چیئرپرسن ریلویز مسز پروین آغا نے کراچی سے اس ٹرین کا افتتاح کیا اور یہ ترین افغانستان کے تاجروں کو کراچی سے پشاور تک مال برداری کی سہولت فراہم کریگی۔ " گیتا" کی بحالی وزیر ریلویز خواجہ سعد رفیق کے اس وژن اور پروگرام کا حصہ ہے جس کے تحت پاکستان ریلویز کے فریٹ کے شعبے کو مضبوط بنایا جا رہا ہے۔ پاکستان ریلویز اس وقت 2012 کے مقابلے میں فریٹ سے سات سے آٹھ گنا زائد ریونیو حاصل کر رہا ہے، اسے ڈیڑھ ارب سے بڑھا کے ساڑھے دس ارب روپوں تک پہنچا دیا گیا ہے جبکہ مال برداری کے لئے پانچ برس پہلے صرف سات لوکوموٹیو استعمال ہو رہے تھے جن کی تعداد اس وقت نوے سے زائد ہے جبکہ اسی برس جنرل الیکٹرک کے تمام لوکوموٹیوز کی درآمد مکمل ہونے کے بعد سوا سو سے بھی زائد ہو جائے گی۔ پاکستان ریلویز ساہیوال کول پاور پلانٹ تک کوئلے کی نقل وحمل کے لئے خدمات کی فراہمی سے ساڑھے تیرہ ارب روپے سالانہ کا مزید رپونیو بھی حاصل کرے گا اور ملک میں لوڈ شیڈنگ کے خاتمے میں اپنا کردار بھی ادا کرے گا۔ پاکستان ریلویز نے فریٹ کے کام کو بڑھانے کے لئے جہاں پی ایس او کے ساتھ فیول ٹرانسپورٹیشن ایگریمنٹ کر لیا ہے جبکہ میپل لیف اور چراٹ سمیت دیگر تجارتی اداروں کے ساتھ کاروباری روابط کو فروغ دیا جا رہا ہے۔ چیف ایگزیکٹو آفیسر پاکستان ریلویز محمد جاوید انور اور ایڈیشنل جنرل مینیجر عبدالحمید رازی نے ٹرین کی بحالی کو خوش آئند قرار دیتے ہوئے کہا ہے کہ پاکستان ریلویز ابتدا میں ہر ہفتے ایک ٹرین چلائے گا تاہم بعد ازاں ٹرینوں کی تعداد بڑھائی بھی جا سکتی ہے۔ انہوں نے بتایا کہ گیتا سے ابتدا میں ہر ہفتے پاکستان ریلویز کو دو سے تین ملین کے درمیان امدن ہو گی اور یہ تاجر برادری کو مال برداری کی سستی، محفوظ اوربااعتماد سہولت فراہم کرے گی۔