وزیراعلی پنجاب عثمان بزدار نے کہا ہے کہ حکومت غیرملکی سرمایہ کاروں کو ساز گار ماحول فراہم کررہی ہے اور وہ پنجاب میں موجود سرمایہ کاری کے وسیع مواقع سے بھرپور استفادہ کرسکتے ہیں

پیر کے روز پاکستان میں سعودی عرب کے سفیر نواف بن سعید احمد المالکی سے اسلام آباد میں ملاقات میں انہوں نے کہاکہ حکومت سعودی عرب کے سرمایہ کاروں کو ہرممکن سہولیات فراہم کرے گی ۔انہوں نے باہمی دلچسپی کے امور پر بھی تبادلہ خیال کیا ۔وزیراعلی پنجاب نے کہاکہ پاکستان کی ترقی میں سعودی عرب کا تعاون قابل تعریف ہے ۔سعودی عرب کے سفیر نے سماجی بہبود اور سماجی شعبے کی ترقی کیلئے حکومت پنجاب کی جانب سے اٹھائے گئے اقدامات کوسراہا ۔انہوںنے کہاکہ دونوں ممالک نے ایک دوسرے کو بھائیوں کی طرح حمایت کی ہے اور دوطرفہ مفاد کے مختلف امور میں ہم آہنگی اور تعاون جاری ہے ۔