وزیراعظم عمران خان نے کہا ہے کہ حکومت گلگت بلتستان کی ترقی کیلئے پر عزم ہے اور اس مقصد کیلئے ایک تاریخی پیکج کی منظوری دی گئی ہے۔
انہوں نے جمعہ کے روز اسلام آباد میں گلگت بلتستان میں مواصلاتی سہولتیں مزید بہتر بنانے سے متعلق ایک اجلاس سے خطاب کرتے ہوئے کہا کہ پیکج سے خطے کی ترقی کے نئے دور کا آغاز ہو گا۔انہوں نے کہا کہ ماضی کے مقابلے میں حکومت کی جانب سے مختص فنڈز میں اضافے سے گلگت بلتستان میں مواصلاتی روابط بڑھانے میں مدد ملے گی جو علاقے کے لئے حکومتی عزم اور توجہ کا مظہر ہے۔وزیراعظم نے انفارمیشن ٹیکنالوجی کی وزارت ٗ ایس سی او اور پی ٹی اے کو ہدایت کی کہ وہ گلگت بلتستان میں مواصلاتی سہولتوں کی بہتری کیلئے کوششیں جاری رکھیں۔انہوں نے کہا کہ علاقے میں تھری جی اور فور جی سروسز کی دستیابی گلگت بلتستان کے نوجوانوں کو ہنر مند بنانے اور علاقے میں سیاحت کے فروغ کیلئے ناگزیر ہے۔
