فائل فوٹو

خیبرپختونخوا کے وزیراعلیٰ محمود خان نے کہا ہے کہ حکومت عوام کو علاج معالجے کی بہترین سہولیات کی فراہمی کے لئے صحت کے شعبے کو جدید دور کے مطابق ڈھال رہی ہے۔

پشاور میں آج (ہفتہ)جاری کئے گئے ایک بیان میں انہوں نے کہا کہ حکومت بڑے ہسپتالوں میں مر یضوں کا رش کم کرنے کیلئے تمام ڈسٹرکٹ ہیڈ کوارٹر ہسپتالوں کو اپ گریڈ کر رہی ہے۔محمود خان نے کہا کہ اس بجٹ میں صحت کے شعبے کیلئے پچیس ارب روپے کی لاگت کے ایک سو بتیس منصوبے شامل کئے گئے ہیں جبکہ صحت کارڈ منصوبے کیلئے دس ارب روپے مختص کئے گئے ہیں۔وزیراعلیٰ نے کہا کہ گزشتہ چار سال کے دوران ڈاکٹروں کی کمی پر قابو پانے کیلئے ہسپتالوں میں سپیشلسٹ سمیت تین ہزار سے زائد ڈاکٹرز بھرتی کئے گئے ہیں۔