بھارت نے نئی دلی میں پاکستانی ہائی کمیشن کے عملے کے خلاف جھوٹے اور بے بنیاد الزامات کی شرانگیز مہم شروع کی ہے جس کا مقصد دنیا کی توجہ مقبوضہ کشمیر میں جاری ریاستی دہشت گردی سے ہٹانا ہے۔
یہ بات اطلاعات و نشریات کے وزیر سید شبلی فراز نے آج ایک بیان میں کہی۔انہوں نے کہا کہ پاکستانی ہائی کمیشن کے سفارتی عملے کو اپنے فرائض کی انجام دہی سے روکنا اور ان پر تشدد اور گرفتاریاں انتہائی قابل مذمت ہیں۔سید شبلی فراز نے کہا کہ بھارت اپنے تمام ہمسایہ ممالک کے خلاف جارحیت کا ارتکاب کر رہا ہے۔ انہوں نے کہا کہ بھارت کے مذموم توسیع پسندانہ عزائم کے باعث چین جیسا ترقی اور امن پسند ملک بھی اپنی فوج سرحد پر لانے پر مجبور ہو گیا ہے۔وفاقی وزیر نے کہا کہ میڈیا نیپال سے بھی ایسی ہی خبریں دے رہا ہے۔